Durante este curso todo o alumnado do cole de Olveira, xunto co profesorado, realizamos moitas actividades relacionadas co coidado e a protección da natureza. Plantamos pementos, grelos, cenorias, cabazas e fabóns no horto escolar. Tamén fresas en macetas grandes e pequenas. Plantamos, observamos e coidamos moitas árbores froiteiras como nogueiras, maceiras, pereiras e oliveiras. Asemade reflexionamos e falamos sobre accións da nosa vida cotiá que contribúen ao coidado e respecto do medio ambiente, a un consumo sostíbel e ao aforro de enerxía. Fixemos murais informativos e tamén saídas ao Parque Natural, observando de primeira man os danos do refugallo abandonado na praia da Ladeira.

Agradecer dende aquí  a colaboración das familias con diferentes actividades, como a plantación de árbores autóctonas, e desexarvos a todos e a todas un bo verán.

Vémonos en setembro!!

Os nenos e nenas de varios cursos de Primaria fixeron unha saída, o pasado venres, ás dunas e a praia da Ladeira. Desfrutaron moito do entorno natural e recolleron lixo abandonado na praia. Observaron de primeira man o dano que o refugallo fai ao medio ambiente.

Estes días, na área de Inglés, o alumnado de 6° de Primaria fixo un mural onde plasmou as súas suxestións e reflexións para  mellorar o coidado do medio ambiente e parar o cambio climático.

Todos os nenos e nenas propuxeron prácticas na vida cotiá que favorecen a reciclaxe e un consumo ecolóxico e sostible.

Grazas á colaboración das familias o alumnado do cole observa e estuda o espectacular proceso da crisálida; ovo, eiruga, crisálida e bolboreta.

As fotografías foron feitas pola nai dunha alumna de 5° de Infantil.

As nenas e os nenos de 5º de Infantil observan, coidan e regan as plantas de amorodos que plantaron coa súa mestra. Axiña agromarán moitos amorodos.

Canto medran os faballóns que plantaron os nenos e as nenas de 6º de Infantil!!

Estas plantas grandes e alongadas son da familia das leguminosas e producen fabóns.

Pandeiretas, tambores, maracas, xilófonos e castañolas foron feitos con diferentes materiais de refugallo polos nenos e nenas de 5º e 6° de Primaria.

As cenorias son moi ricas en  vitaminas e minerais. Poden comerse  crúas ou cociñadas de moitas maneiras.

Os nenos e nenas de 1° de Primaria recolleron e saborearon as cenorias que plantaron observaron e coidaron no horto escolar.

O alumnado de 5° de Primaria rega as árbores froiteiras que plantamos no patio do noso cole.  

Nestes días de calor é necesario facelo con frecuencia.  

As nenas e os nenos de diferentes cursos  participan nesta actividade regando por quendas.

Estamos no tempo de plantar pementos. 

Os nenos e nenas de 1º de Primaria plantaron pementos nunha maceta do horto escolar.

Os pementos son hortalizas ricas en vitamina C, fibra, hidratos de carbono e minerais. Poden ser de cores moi diversas: verde, amarelo ou vermello. E ou seu sabor é diferente dependendo da cor e da forma.